Sankt Nickelaus

unn de Geist vom Schenke

Was is uff dem Bild zu sehn? E Körbche Walnüss – richtich! E Päckche Bergkäs‘ – aach richtich! E Bumerang – stimmt! Unn e sympathischer junger Mann – stimmt aach! Das bin nämlich ich. Es Mondgesicht kommt vom Cortison, das ich noch e Johr lang innemme muss.
„Unn was hott das middem Nickelaus zu dun?“, frage Sie jetz. Ei, die Walnüss sinn 100 Prozent bio in unsre Ländereie anneme große, alde Walnussbaam gewachs. Jed Johr im Herbscht mäht unser guder Nachbar Holger Glockner es Gras drunner unn bläst es Laub fort, damit die Doro unn ich die Nüss gut raffe könne. Das hommir kürzlich widder gemacht unn die nasse Nüss hinnerm Küche-Herd getrockent, damit ich moins e Handvoll immeim Müsli mampfe unn die Doro e zwett Handvoll uff ihrm Nutella-Toast mufele kann.
Dies Johr war e gut Walnussjohr. Do lange die Nüss dicke bis nägschte Herbscht, unn nit nur das, so reich war die Ernte, dass mir aach Nüss verschenke könne. Uff dem Fotto steht unser Nickelaus-Geschenk für de Doro ihr Vadder Rainer, der genauso gern Walnüss isst wie ich. Unn damit de Doro ihr Mudder Waltraud nit leer ausgeht, kriet sie zu Nickelaus e Stück von ihrer Lieblingskäsesort‘: Bergkäs‘.
Unn was hott der Bumerang mit Nickelaus zu dun? Der is es Symbol inneme Gedicht vommir, das ich gleich zidiere, damit Sie’s ausewennich lerne könne. Kä Ängscht, mei Gedicht hott kä 425 Zeile wie em Schiller sei „Glocke“, sondern nur vier Zeile, awwer die honn’s in sich unn gehn so:

„Die Freude ist ein Bumerang,
sie kehrt zu dir zurück;
es war noch immer so bislang:
Dem Schenker schenkt sie Glück.“

Is das nit e Wunner: Mer schenkt Freud‘ unn kann sich üwwer die Freud vom Beschenkte freue. Nit um was retour zu krien, schenkt mer, sondern ohne Absicht – unn kriet was Unbezahlbares zurück: es Strahle im Gesicht vom Beschenkte, sei Glück unn sei Dankbarkeit. Unn das funktioniert nit nur mit Walnüss oder Bergkäs‘ so, sondern mit allem, was mir mit Liebe schenke.
A propos Liebe: Das is jo es gröschte Geschenk üwwerhaupt. Unn was braucht’s dezu? Nit viel unn doch viel. Es braucht unser Uffmerksamkeit für die, die mir beschenke wolle: e wacher Blick für ihr Mimik unn Gestik, e Ohr für ihr leise Tön unn unausgesprochene Worte, e Gespür für ihr Not, ihr Ängschte, ihr Sehnsucht. Wemmir dodruff achte, könne mir nit nur mit Liebe schenke, sondern Liebe selbscht verschenke. E kostbarer Geschenk gibt’s nirjendswo zu kafe, selbscht für em Bill Gates sei 96 Milliarde Dollar nit.
Alla dann
Ihr Gerhard Engbarth